NIEUWS/AGENDA laatste update: 29 januari 2012

Huis 'in de bergen', Ruinerwold, een van de theologische schooltjes voor 1854 van de Afgescheidenen van 1834. (Crayontekening van Hein Kray, 1953)

NIEUWS:

Nieuwe uitgave:

“UUT DE TIED KOMEN”

Dit boek voorzag blijkbaar in een grote behoefte, het is inmiddels uitverkocht.

- Stichting Historie is op zaterdag 16 oktober 2010 verhuisd zijn naar het
vroegere schoolgebouw "De Dissel" Burgemeester Buitenweg nr 8 in Ruinerwold.

- Tekst Thomasvaer en Pieternel staat nu op de website.

- Het nieuw periodiek is verschenen: zie periodiek

- Een groot deel van het Foto-archief is nu on-line te bekijken !!

- Nieuw: Inhoudsopgave van alle periodiekeen van 1984 tot en met 2007 vind u hier.

Dit schilderij van de cooperatieve Melkfabriek Algemeen Belang uit de jaren 50 werd in opdracht van de Stichting Historie gerestaureerd door Cor Koppenol en hangt nu in Museumboerderij de Karstenhoeve in Ruinerwold.

.

Nieuwe aanwinsten in het archief :

Voor een ieder: Voor ons archief blijven aanvullingen erg belangrijk !!

Unieke foto's (glasplaten) van de familie Brouwer in Broekhuizen:

Thomasvear en Pieternel , januari 2012

Voorgedragen op de nieuwjaarsvisite van de Stichting Historie Ruinerwold op maandag 9 januari 2012, door Jannie Timmerman en Albert Jalvingh.

Tekst: Albert Jalvingh.

T. P. Goeienaovend volk.

P. Beste meinsen wij wilt begunnen
um oe mit mekaar een gelokkig en gezond 2012 te gunnen.
Het klinkt wel wat raar potverdorie
mar 2011 heurt ook al weer tot de historie.
Een jaor is toch ook zo mar weer veurbij
want veur daj der arg in hebt is het al weer old en nij.
Toch is er het ofgelopen jaor wel weer het een en aander gebeurt.
Dat hij kunnen lezen of wij hebt er van eheurd.

T. Nijjaorsnacht was er niet zoveul an de haand,
mar toch kwam de M.E plotseling anelaand.
Die lui moei niet tegen praoten
want die hebt methoden zo daj dat een aandere keer wel wilt laoten.

P. Ja dan kuj beter niet in de buurte wezen
want schuldig of niet dat kunt ze in oen ogen niet lezen.
En zo hef het er ene mitemaakt
dat hij op een zeer geveulige plekke worde eraakt
Het is mar te hopen
dat het wieder goed mit hum is ofelopen.

T. Bas Bult zulf al enkele jaoren patient
is al ies deur de stichting Opkikker verwent.
Hij is now ambasadeur veur die stichting
Hij probeert geld in te zamelen veur KiKa en dat is een geod ding
Tiedens een voetbal wedstried Runerwold-Wacker worde er een verlotting en een Bingo rganiseerd
De inzet van Bas wordt arg waardeert
Een vertegenwoordigster van KiKa kun nao ofloop 2 cheques mit een gezamelijke weerde van 2500 euro uut Bas zien haanden in ontvangst nemen.
Een teken dat de meinsen graag veur dit goeie initiatief wilden geven.

P. Op het Sportgala van de Muppeler kraante wordt er jaorlijks diverse onderscheidings uutekeert.
Roelie Baas worde het of gelopen jaor mit de titel vrijwilligster van het jaor vereert.
Veur de komende yerkiezing sportploeg van het jaor
lig er now een nominatie veur Kios klaor.

T. Henri T. zag het gebeuren
dat een jongeman mit kratties bier leup te leuren.
Hij haalde die uut een schure van de overburen vandaon
Henri is er direct op of egaon
De jonge man bleek de niet zo best bekend staonde B.
Dizze man pakken leek Henri een goed idee.
Mar dizze bier rover
gaf zich nog niet zo gauw over.
Breur Frits die net mit de shovel op huus an kwam
Worde deur zien vrouw Janny ewenkt dat hij mus op dat stel an.

P. B. gung hevig tekeer
en reup ie doet mij gien zeer.
Frits gung de politie bellen,
mar het was moeilijk um dit geval dudelijk te vertellen.
B. die brulde mar deur
as ie mij an raakt dan sleep ik jullie veur het gerecht heur.
Ja dan zal ik oe der bij lappen
en hij wus te ontsnappen.
Hij zette het op een lopen man,
Frits mit Henri in de shovelbak der achteran.
En lopen dat hij kun die jonge man

T. Mar uut eindelijk kun hij tegen het uutholdingsvermogen van de shovel toch niet an.
Op de Wolddiek kregen ze hum weer te pakken
Frits en Henri zaten now toch wel naor de politie te snakken
Mar nao een kwartiertien of zo
kwam de politie en hebt hum mit eneumen naor het buro.

P. Inbouw en aansluitservice Kwaant
is een nij bedrief in het Runerwoldse laand.
Steeds meer meinsen gaot allerlei apperaten via Internet kopen.
Mar bij het ansluten wilt ze dan nog wel ies tegen wat problemen anlopen.
Het scheelde hun nogal wat in de ankooppries
Mar uit de bij gesleuten beschrieving wordt ze soms niet zo veule wies.
Gerko Kwaant bud dan de helpende haand
Hij hef van heel veul apperaten verstaand.
Ook bij verhuzing of verbouwing wilt er nog wel ies problemen ontstaon
Ook dan kun ie heel goed naor Gerko Kwant gaon.

T. Sinds de herindeling woont Albert Brunsting niet meer in Runerwold
mar dit dorpien lat hum beslist nog niet kold.
Muppel pronkt now ook mit zien veren
as plaatselijke kunstenaar mug hij in expositie Uitgelicht zien kuunstwarken etaleren

P. Het is alweer een hele tied eleden
Mar wij wilt er hier toch nog even aandacht an besteden
Willem en Sjoukje R. van het Boerpad kwamen op het idee
um de jaorwisseling eens mit te maken op een heel aandere stee
Samen mit Frans en Aly B. zullen ze een busreize naor Londen maken.
Mar der kwamen nog heel wat hindernissen veur ze de overtocht gungen maken.
Willem had zien paspoort vergeten,
mar och die was hij toch ook niet neudig bij zien weten.
Bovendien denkt hij ik heb een eerluk gezicht
ik denke dat de douane daor wel veur zwicht

T. Mar de reisleider bracht hum an het verstaand
dat hij zo beslist niet binnen kwam in Engelaand.
Zij denkt hoe moete wij daor now mit an,
wij wilt toch ook wel graag naor Londen as het even kan.
Zij bint mit de trein van Breda naor Zwolle egaon
waor ze deauto hadden staon.
Toen op Runerwold an
Zeune Jaap zul een vliegtuug boeken as het even kan.
Dat lukte nog net
en zo hebt Willem en Sjoukje hun reize voortezet.
Zij zaten al laank en breed in het Hotel
Toen kwam pas het aandere reisstel

P. Die reisgenoten hadden niet verwacht
dat ze deur Willem en Sjoukje worden opewacht.
Zo kwam alles toch nog terecht
allent veur de portmenee was het wel wat slecht.
Now ja as ze dat gat dichte wilt lappen
dan mut Sjoukje nog mar wat voeties meer bekappen.

T. 2500 banen in Runerwold was een kop in deMuppeler kraant.
Dan denk ie al gauw wat is hier an de haand.
Runerwold Info bij de meesten inmiddels wel bekent
pakte dit jaor groots uut ongekend
Banen ligt er tegenwoordig echt niet veur het griepen,
mar bij Info kuj terechte aj mar op de P.C. kunt typen
Over de beloning wordt niks vermeld
mar dat zal wel 0,0 wezen zo wordt deur oens veronderstelt.
Runerwold Info is van de leste jaoren
en wij hoopt dat ze het nog veule jaoren weet te klaoren.

P. Barging Henk was in2010 mit veul tam tam bij de braandweer uitezwaaid
Hij had daor heel wat jaoren in mit edraaid
Tiedens de vrijwilligers aovend van de braandweer in deWolden stunt Henk nog even weer versteld
Toen hum deur burgemeester Snijders een Koninklijke onderscheiding werd opespelt.

T. Bedrievigheid is er op Runerwold nog zat,
dat bleek nog mar ies weer in de Radio Drente rubriek “op pad”
Jaap J.gung mit Gerard Gras heel wat bedrieven bekieken
die veural gevestigd bint in verlaoten boerderijen zo zul blieken
Heel wat bedrieven waor veul Runerwolders nog nooit van hebt eheurt
Mar het is toch mooi dat daor now van alles gebeurt
Jaap hef zich in het verleden stark emaakt
um te zorgen dat deur bestemmingsplannen dizze gebouwen niet in vervalling bint geraakt.

P.Hij is daor terecht trots op,
al koste hum dizze rondgang haoste de kop.
Op een van dizze bedrieven waren ze nog drok an het verbouwen
toen Gerard en Jaap langes kwamen sjouwen.
Op die plekken lopen is altied niet zunder gevaor
enJaap die is nog al topzwaor
Hij strukelde en kwam in een diepe putte terecht.
Ja de ofloop leek even slecht
hij deut hum gloepens zeer
mar gelokkig gung het nao een posien wel weer.

T. In januari was er bij Centraal weer een Dava daansaovend
now gebeurt dat wel vaker dat is mij wel bekend.
Mar zeg Pieternel ik meende altied dat Dava betekende Door alleenstaanden voor alleenstaanden.

P. Ja Thomasvaer zo is het ook wel begunt
mar der bint tegewoordig aandere middelen waor aj mit an een partner komen kunt
Men giet tegenwoordig deten
Dava betekent now “daansen veur allen” bij mien weten

T. In het paand van Reinders an de Karkweg is weer heel wat activieteit
Bert Reinders was veur 2 jaor noodgedwungen uutescheid
Vrouw Reinders bleef de ofdeling warkkleding beheren
en now giet ze het mit man en zeune het ook mit fietsenverkoop proberen.
De spuiterije is in gebruuk eneumen deur Straal en Coatingbdrijf Hoogeveen
En zo liekt het bedrief toch weer een beetien op veurheen.

P. De braandweer hef vake zwaore en moeilijke klussen
mar dat ze heur zulf goed ontspannen kunt dat wete wijook wel ondertussen
Soms lup het ook welies wat uut de haand
Zo gung het ook Edwin T., want oje waor had hij zien verstaand
Hoe hij bij huus ekomen is dat wete wij niet,
mar eenmaol daor was hij de richting helemaol kwiet
Hij dacht ik wil zo gauw mogeluk naor bedde toe
endeuk pardoes onder de dekens bij zien va en moe.

T. Garage Burgwal bestund 25 jaor
en hef net weer een uutbreiding klaor
begunnen op 400 veerkaante meter is de oppervlakte inmiddels uutebreid tot 1600 veerkaante meter grondgebied.
Zij blieft graag goed bij de tied.
Warken doet ze arg klantgericht,
as er een klaante in nood zit moet ie hum as het even kan helpen dat vuult ze as plicht.

P. Soms gaot de services wel heel arg wied, haost ongeheurd
Zo is hij zelfs een keer naor Parijs toeescheurd
um een gestraande klaante op te halen
Tja dat bint natuurlijk mooie verhalen.

T. Minder mooi worde het an het ende van het jaor
tweede karstdag worde der inebreuken vandaor.
Die lui zorgden niet allent veur een grote chaos
mar namen ook de braandkaste mit alle autosleutels en papieren der in mit,ja dan bij echt de klos.
De schade is moeilijk in te schatten
want misschien koomt ze now ook nog wel auto s jatten.

P. Kapsalon v.d.Barg hef het ofgelopen jaor een ware metamorfose ondergaon
Mar veur het zowiet was is er nog al het een en aander gebeurt waor wij now even stille bij wilt staon.
Op een aovend nao het slopen had Lucel zien smerige kleren gauw even in de wasmachine edaon
Um nog even gezellig een borreltien mit Femke te drinken veur en bedde te gaon.

T. Mar opeens heurden zij een wat raar geluud in huus
het gung mar tik tik tik ja der was iets niet goed pluus
Nao een onderzuuk zul blieken
dat ze mar ies in de wasmachne mussen kieken
Toen bleek dat Lucel zien braandweerpieper niet uut de kleren had edaon
en daor kwam dat getik vandaon.
Het apperaat kun daor niet tegen
mar hij zat niet zo lange zunder verlegen
Zien net ofgezwaaide breur Henk had nog zo n apperaat
en zo was Lucel al gauw weer paraat

P. Tiedens de verbouwing hebt ze zolange eknipt in de olde slagerije van Koetsier
zodat de bouwvakkers vrij spel hadden hier
Op een middag gung Lucel ies even bij de verbouwing kieken
zij hadden net beton estort zo zul hum blieken.
Mar toen kreeg hij de schrik van zien leven,
die beton begunde te beven

T. Hij dachte even der zit vaste een rotte in het nauw
mar het was heel wat aanders bleek al gauw.
Dribbel de hond kwam mit zien kop uut de beton vandaon
Zij hebt hum toen mar heel gauw onder de douche edaon
Want en dat liekt mij veur dat diertien echt gien pret
was hij aanders levendig opezet.

P. 65 jaor Kunst Na Arbeid
dat is zowaor gien kleinigheid
Zij vierden dat mit een successtuk van hun uut een ver verleden
Jan Hester speulde toen ook al mit,en speult nog steeds tot op heden.
Ja KNA hef veule an Jan Hester te daanken
want hij stunt in februari al 55 jaor op de plaanken.
Dini de Jonge vierde ook al een jubileum van gold
Mar thomasvaer die is toch helemaole nog niet old.

T. Albertien de Leeuw 60 jaor,Lies Brink en Gre Mos 50 joar
Albertje Ridderman,Tineke Kwint,Hinnie Wever,Aly Slomp en Hennie v.d. Linde 40 jaor
Nee dit is niet de leeftied van dizze personen
Mar dit bint de jaoren dat ze de bijeenkomsten van de Vrouwen van Nu bij kunden wonen.

P. Dat Zaal Reinders der niet meer is
was ook veur deVrouwen van Nu Oostende een groot gemis
Veur het 60 jaorig jubileumfeest gungen ze uutwieken naor het westen
mar dit zul de sfeer niet verpesten.
Bij Cafe Centraal kregen ze een warm onthaal.

T. Veur de Stichting Historie was het een bizunder jaor
der kwamen mar liefst 2 boeken klaor
De rijke geschiedenis van Haakswold en Uut de Tied komen
now bint ze bezig mit een boek over de Larijweg klaor te stomen.

P. Runerwold had in februari even weer een Gemeentehuus zowaor
Het toneel van Cafe Centraal was hier het decor veur vandaor
Het Gemeentehuus was het crisiscentrum van een nachtelijke geheime miltaire oefening
Mar dat zich daor ook heel aandere zaken ofspeulden is een aander ding.
Now was der in het verleden al ies eerder zo n oefening ewest
en hadden ze het gruslaand van een boer beheurlijk verpest.

T. Jan de Leeuw vader van 3 Udianen die in dit stuk meededen
worde ofgelopen zomer herinnert an dit verleden
In de late aovenduren worde hij deur een buurman ebeld
Der waren militairen bezig in zien grusveld
Die boer in het toneelstuk worde een schadeloosstelling in het veuruutzicht estelt
mar hij had nog nooit een cent eziene zo hef hij vertelt
Jan en zeune Menno der in het nachtelijk uur op hoge benen der op of.
Want um onangekondigt het gruslaand en ofrastering te vernielen was hun wat al te grof.

P. De soldaoten lachten heur as het ware wat uut
mar dit geval kreg nog wel een startien zo was hun besluut
En zo hebt wij vernomen
is Defensie goed over de brogge ekomen.

T. Wij gaot now even staken
um aanderen de gelegenheid te geven um jullie te vermaken.

T. Hennie Mulder en Hillie Kleis
gaot vake samen op reis
Dat ze nog veul meer dingen samen doet
komp deur hun identieke genen in hun bloed.
Dizze eeneiige tweeling worde in meert samen 150 jaor
Een mooie grote foto in de kraante van daor.

P. Kios worde het ofgelopen jaor van de zaalcompetietie in de eerste klasse kampioen
en now bliekt ze het in de overgangsklasse ook prima te doen.
Op het veld gung de promotie net niet deur,
mar misschien dit jaor, zij staot er nog aordig goed veur.

T. Harm L. stek in het vrijwilligerswark heel wat tied.
Mar broeder of historiecus Harm is de weg soms ook helemaole kwiet.
Toen hij op een aovend zien vrouwe van het karkkoor ophalen wol
meuk hij het wat al te dol.
Harm op dit terrein toch goed bekend, mar het zicht was slecht
en veur hij der arg in had kwam hij mit de auto in de sloot terecht
Hij is het ofgelopen jaor nog een keer in de sloot belaand

P. O ja wat was er toen dan an de haand?

T. Een van zien kleinzeunen giet nog al ies zien uutgebreide gazon meeien
Och die viendt dat ook wel mooi dat rondties dreeien.
Hij deut dat Harm best van t zin
Allent hij bleef wat wied van de slootkaante ,dat vundt hij toch wel een min.
Toen Harm het zulf deed een keer,
dacht hij ik gao wat dichter an de slootkaante langes dit keer
Dat gung mooi en hij worde hoe langer hoe driester
Mar toen opeens was de meeier het speur biester.
Albert Kleis die het zag gebeuren,
is gauw mit de krane hen egaone um hum weer uut de sloot te beuren.

P. Slager Ard Zorgde van t veurjaor veur enig rumoer hier
hij zul zich vestigen in de olde slagerije van Flier.
Men vundt dit van Sietse Koetsier een stomme zet,
mar dizze mensen hadden niet goed opelet

T. Want de dag dat Ard daor de zaak openen wil
bleek de daotum van 1 april.
Dat de wokkel van Bleidenstein die dag een stok miste
bleek dat die persoon zich niet vergiste

P. Andre Wienen en Erwin Buld bint van die mannen die wel wat ondernemen duurt
Veur een reunie van Runerwoldse bands hadden ze een grote tente ehuurd
Mar wanneer aj daor een keer zo n grote tente hebt staon
dan kun ie en moet ie daor eigenlijk wat meer mit doen aanders kun ie lelijk de mist in gaon.
En zo is de schoelreunie commissie geboren
en gung zo een deel van hun risico verloren.
Nao een lange veurbereidingstied
was het eindelijk zo wied

T. 14 mei was er die reunie en hoe
Bijna 800 oldleerlingen en docenten kwamen hier naor toe
Om te praoten was er schienbaar heel wat stof
en de reuniecommissie oogste heel veul lof
De Stichting Historie had een stand mit o.a.veule olde schoolfotos emaakt
Een hoop bezeukers bint ook hier heel wat tied kwieteraakt.
Frans Nooren had anebeuden om klasse of groepsfoto s te maken,
En wij hebt eheurd hij deut heel goeie zaken.
Ook de Historie kreeg van iedere foto een exemplaar
Alle hulde veur dit simpathieke gebaar.

P. Veule klasgenoten bint s aoveds gezamenlijk uut eten egaon
En zo hef ook de plaatselijke Horeca goeie zaken edaon.
‘s Aovends was er de reunie van de Runerwoldse bands eplend
en dit succes was ook ongekend.
Dit was toegankelijk veur iedereen
zij kregen bijna 1100 mensen op de been.

T. As een boer s aovends um half achte in Echten op een vergadering mut wezen
dan mut hij flink an pezen
Arend W. wet er alles van
en denkt ik ete onderweg wel mien boterham
Hij had er de sokken beheurlijk in
En ook het eten gung naor Arend zien zin.
Opeens kwam een politieauto hum inhalen
Arend denkt dat wordt balen

P. Hij mus stille staon
want hij had overtredings begaon
Arend dacht hier 80 te maggen rieden
mar dat bleek 60 sinds enige tieden.
Niet handvrij bellen is niet toeestaon,
mar Arend had mit zien broodeten de zelfde fout begaon.
Het was veur hum een hele toer
um wat medelieden te wekken veur dizze boer.
Arend zien verhaal had schienbaar zo veul indruk emaakt
zodat de agent gien bekeuring hef opemaakt.

T. Runerwold hef er weer een straote bij ekregen
Garage Mos hef now een wasstraote en die kwame wij hier nog niet eerder tegen.
Wil ie now gauw even oen auto wassen
dan hoef ie niet meer naor een naoburige plekke te verkassen.

P. Jan O. de partner van de hier vanaovend vrouwelijke president
was bij het uut reiken van het Haakswoldboek absent.
Hij had zien schoenen vergeten
En op de klompen wol hij niet mit zo leut hij Janny weten.
Zij stundt er die aovend dus zunder heur Jan veur,
en eerlijk gezegd stelde zij ook een beetien teleur.

T. Mar Pieternel as ik die twij zo bekiek
dan bint die voeten aordig geliek
Mug het nog ies gebeuren Jan
dan trek ie toch gewoon een paar schoenen van Janny an.

P. Wij hebt er hier weer een nije toeristische attractie bij.
Landschappen bekieken en landschappen verhalen anheuren tiedens een wandeltocht dat is nij.
Millieufederatie Drente en de Historie hebt dizze route samenestelt
Diverse personen in Runerwold hebt hun betreffende verhalen vertelt.

T. 2 studenten hebt dit openeumen mit Egbert W.
mar hoe het now net warkt valt um het te snappen veur mij niet zo veul mee.
Ie kunt de route bij het TIP downladen
veur dat ie de wandelroute gaot betreden
Mit GPS en mobiele telefoon kun ie dan op pad gaon
en dan kun ie op de betreffende plekken even stille blieven staon
Zeg Pieternel ie bint wat jonger en zult het wel snappen
mar veur veulen van oens hier is het denk ik moeilijk te behappen.

P. Weer een nije stichting op t Wold
Genaamd Hartveilig Ruinerwold
Binnenkort zal elke dorpskern van een defribiator[AED] worden voorzien.
Zij gaot ook zorgen dat er voldoende vrijwilligers koomt die die apperaten kunt bedienen bovendien.
Het gebruuk van die apperaten zal zo n vaort niet lopen,
dat is te meesten te hopen
Mar in geval van nood
kun ie der mit uutstellen de dood.

T.Veul mensen hadden wel deur dat burgemeester Snijders hier bleef niet zo n hele lange tied
mar wij bint hum now toch wel arg gauw kwiet
De kaans um Hardenberg te besturen
die verleiding kun hij niet verduren
Dit jaor komp waarschijnlijk de benoeming van een nije burgemeester klaar
Jannie Vlietstra nemp zo lange de taken waar.

P. Aaltje F. de jongste niet meer
is nog geregeld veur allerlei zaken in de weer
Zo had ze ofgelopen zomer mede Avondpost in mekaar ezet
mar had ze bij het ofstappen va een stoepe niet goed opelet.
Zij vult mit een smak op de grond
en ja dat is veur zulke olde botten niet zo gezond.
Terwijl ze daor op de grond lag op de dokter te wachten
scheut de humor al weer deur heur gedachten

T. En vertelde ze in vertrouwen,
dat zij now ook heurde tot de groep van de gevallen vrouwen.
Zij had een arm op meerdere plekken ebreuken zo bleek
daor was ze mooi mit onder de pannen menig week
gelokkig giet het now weer goed mit heur
en giet ze vol energie in het leven deur.

P. Bergklanken wun in Duutslaand op een groot concours een eerste pries
En daormit waren ze bizunder wies.
Het veurige jaor hadden ze die onderscheiding mit een paar tienden emist.
Mar mit 86 punten was de eerste pries now onbetwist
Een mooi succes ook veur de nije dirigent.
Zij hebt het contrakt mit Hibma dan ook direct mar verlengd.

T. In de Bleekhof kwamen de meinsen ofgelopen zomer opeens een verkeersbord van 70 tegen.
Mar dit stund veur het feit dat Johan en Stiena Muller 70 jaor eleden
in het huwelijk waren etreden
Een uniek gebeuren vandaag de dag
Wij vraogt oens of,of der over 70 jaor ook nog wel echtparen bint die dit feit vieren mag.

P. Sjaak v. d. Sterre had in juli weer een vriendengroep wedstried organiseert
Dit jaor worde hij ook mit een damesgroep geconfronteert
De rose groep die wel vaker weet te stunten
streden now ook mit veur de meeste punten.
De maoties van Stamkroeg Centraal
gungen wederom mit de eerste pries an de haal.

T. Jeugdige talenten
gungen lopen mit de meeste centen.
Dat was een van de conclusies van het peerdenconcours an het Boerpad.
Het terrein was weer arg nat.
De organisatie is zo langzamerhaand het weer meer dan zat.
Zij hadden dit jaor ook een aovendprogramma in de tente inestelt
en dat was goed geslaagd
zo is mij vertelt.

P. In tegenstelling mit het concours hipiqeu
is het mit de oldtimerdag altied mooi weer dat is toch ook wel uniek
Dit gebeuren hef Runerwold echt op de kaorte ezet
meer dan 1400 voertuegen deden er dit jaor met.
Bertus Redeker een van de gangmakers van dizze dag
hef zulf ook een exemplaar dat er wezen mag
Een Amerkaanse A Ford Speedster in 1929 emaakt
is zo n exemplaar waor menig liefhebber niet gauw op uutekeken raakt
Zes jaor hef Bertus ewarkt an het opknappen van dit ding
Mar hij oogst now heel veul bewondering.

T. Zo n 20.000 meinsen kwamen er of op dit evenement
het liekt wel ieder jaor meer,ja ongekend.
De voertugen waren al lange op huus anegaon,
mar het feesten zul nog lange deurgaon.
Mede deur het mooie weer
heerste er in Diekhuzen nog lange een geweldige sfeer.

P. Ds. Groen is mit pensioen
Zij gaot het in Barghuzen now mit een muis doen.

T. Zeg Pietenel wat moet ik mij daor bij veurstellen.

P. Now zien name is Jan Muis zo heb ik mij laoten vertellen.
Mit zien 54 jaor is hij niet meer zo groen.
Barghuzen hoopt het hier de komende jaoren mit te kunnen doen.

T. Buurtvereniging Oosteinde bestund 60 jaor in 2011
dat het buurtfeest jaorlijks een van de hoogtepunten is dat sprek vanzelf.
Het jubileum zorgde dit jaor veur een grootse anpak
Zij kregen mar liefst drij avenden veule volk onder het tente dak.
De ook zeer geslaagde optocht stelde men vanwege het weer een paar ure uut
en dat bleek een wies besluut.

P. Wij blieft mit de Barghuzers hopen
dat het Dorpshuus goed mag lopen.
Dat vermelden wij veurig jaor
Zij hadden net een wel zeer enthousiaste beheerder anesteld vandaor.

T. Mar het bestuur had het al gauw mit hum bekeken
en stuurde hum de laan uut nao enige weken.
Zij gungen toen zulf het dorpshuus beheren
dat gung goed ,mar is niet vol te holden,zo zul de tied wel leren.
Mark Emmink is now per 1 september as nije beheerder installeert
Hij hef al een catering bedrief en die combinatie liekt hun niet verkeerd.

P. Een magien van een jaor of 17 wol opeen zundagaovend graag de boerderije bekieken van Jan van E.
Zij wol dat veur een verslag in de schoolkraante van het ROC
Het magien wol beslist dat Grietje ook mit gung rondleiden.
Het bedrief was immers van hun beiden.
Toen kwam er een tweede persoon in beeld die zich veurstelde als de vader.
Mar dat vult te betwievelen zo bleek later.
In de tied dat Jan en Grietje stunden te vertellen
was die vader geregeld an het bellen

T. Jan vundt dat toch wel wat raar dat gebel
en nao de boerderij verlaoting van dit stel
gungen Jan en Grietje toch mar ies even kieken of ze ook wat zullen missen
De portomonaie s waren der wel mit het geld er in,mar toch bleken ze heur te vergissen.
Aanderhalf ure later worden ze deur ene van de baank ebelt.
Hun baankpassen waren evunden zo worde hun verteld.
Als hij now even de pincode s geven wol dan kun ze de rekeningen blokkeren.

P. Mar dit hoefde ze bij dit echtpaar niet te proberen.
Jan herkende de stemme van het magien mit ene en eiste de passen retour.
Dit antwoord hadden ze waarschijnlijk niet verwacht van dizze al wat oldere boer.
Mar die oplichters gaven het nog niet op
een ure later belde er een politieman op
mit de mededeling dat ze een paar oplichters in de krage hadden evat en wol now nog even wat verschillende dingen checken.
Jan herkende in de stemme van de agent de zogenaamde vader en denkt ie kunt verrekken.
Zij hebt toen zulf gauw de rekeningen blokkeert
Geef nooit oen pincode of, dat hef dizze zaak nog weer ies eleerd.

T. Het Runerwoldse zomerfeest had weer wat nijigheden
de kaortaovend hef al een lang verleden
Dit keer was er niet allent klaverjassen en jokeren
Mar kunnen de liefhebbers ook pokeren.
Meer dan 30 personen hebt hier gebruuk van emaakt
waorvan sommige speulers beheurlijk in trans waren eraakt
De donderdag aovend was nogal ies een probleem
zij kregen dan vake te weinig volk op de been
Dizze aovend was in de eerste plaats veur de olderen,mar die leuten het nogal ies ofweten.
Mit een beslist interessant programma hoopte men dizze keer een breder publiek welkom te kunnen heten.

P. Grote sterren als Bonie St Clair, Henk Wijngaard en Marianne Weber kwamen hier naor toe.
Mar erbleek ook nog een Runerwolds talent in de tente te zitten en hoe. Albert Kleis junior hef zien eerste chowbisniss schreden ezet
Hij zung as standin van Frans Bouwer mit Marianne Weber een geweldig duet

T. Ook de runerwoldse blaoskaken Frits T.en Martin S. hadden het publiek al vermaakt.
Mit hun playback chow was het publiek al in de goeie stemming eraakt.
Een pracht aovend werd het in de tent
mar de opkomst van publiek was ook dizze keer niet ongekend.

P. Het veurstellen van Roelof en Lammie Luten deur Burgemeester Snijders an Koningin Beatrix zal hij niet gauw vergeten.
En nog veul meer hoge pieten mug hij welkom heten.
Dit gebeurde in de Stapel mit de opening van de Muur tegen zinloos geweld.
Een van zien leste taken in dienst van deWolden stundt in de kraante vermeld.

T. Ie hebt clubs van peddelaars die in de rondte ried
Mar ie hebt ook lui die mit de solex de tied sliet.
Willem O. van de Larijweg is zo n man
die graag mit die club op pad giet as het even kan.
Hij genut dan van de natuur en koeien in de weide
van de mooie bossen blujende heide.

P. Mar Willem die graag praoten en kieken te gelieke mag
kwam plotseling in een gat wat hij niet zo gauw zag.
Hij gung onderuut en had zich flink bezeerd
mar hij gung wel wieder al was hij niet ongedeert.
Willem kwam s aovends weer bij zien vrouwe Hillie thuus
en die ontdekte al dat mit Willem is er iets niet goed pluus
Zij gungen samen in bad
Hillie zeg ie hebt blauw oen hele gat
Toen kwam het hoge woord er uut
ik gunge mit de solex onderuut.

T. Volk wij gaot now weer even stoppen
en koomt straks mit de rest op de proppen

T. Bij de Ijsboerderij gebeurt altied wel wat
Ofgelopen jaor hebt ze het woonhuus grondig onder haanden ehad
mar ja het bedrief mut natuurlijk gewoon deurgaon
en de bezukers wilt ze graag in alles bijstaon.
Niet allent kiender koomt hier graag anlopen,
mar ook nog al wat olderen koomt hier een ijsco kopen
Veule daorvan riedt tegenwoordig op een electrische fiets.
Een oplaadpunt daorveur dat leek hun ook wel iets
Zij gungen dan ook zo n punt maken
want as fietser moet ie wel veur een lege accu waken

P. Zo kwamen er het ofgelopen zomer een paar fietsen an dat apperaat terecht
mar ja opladen deut dat ding niet echt .
Bij v. d. Linde snapten ze der ook niks van
hoe dat now zo opeens kan.
Opeens was de zaak opelost
mar dat hef nog al wat tied ekost.
Uuteindelijk bleek er mit de verbouwing een fout begaon
waordeur er op dit oplaadpunt gien stroom meer bleek te staon.

T. Het bestuur van de Historie is arg aktief
mar soms dan handelt ze ook wat naief
Toen ze wat restanten van een bommenwarper
hadden opehaalt en dat bij de gemeente hadden emeld
hadden ze dat nooit maggen doen werd Egbert W. verteld.
Dit was Rijksbezit zee de betreffende ambtenaar
En ook het ummegaon mit dergelijk materiaal geeft groot gevaar.

P. Toen RTV Drente ook locht kreeg van dit oorlogsverleden
gungen ze daor uutgebreid aandacht an besteden
Dat vult bij de Gemeente helemaol verkeerd
zij hebt toerisme hoog in het vaandel staon hebt ze altied beweert
Mar now werd de Historie evraogd de publiciteit te mieden
Want wetholder Jan ten Kate wol ramptoerisme niet graag in dizze tieden
Of er nog wieder onderzuuk naor de bommenwarper giet komen,
daor bint Gemeente en Defensie now nog over an het bomen.

T. Dat de meinsen vrogger veule veur de karke over hadden is een bekend feit
In 1883 duzend gulden schenken was toen beslist gien kleinigheid
De geefster mevr. W.A.Geerts vundt dat er een orgel in de karke mus komen
Argens in Nederlaand vunden ze een Amoor-orgel uut 1743 en daor bint ze anekomen
Het orgel is pas weer restoureerd
kan weer jaoren veuruut dat hef detied inmiddels wel eleerd.
De enige naozaat van die mevr.Geerts hef now een groots concert organiseert
want hij vuult zich arg vereerd.
Berend Dekker bespeulde dit orgel al 65 jaor
en Jannes Koetsier 40 jaor en die is er nog lange niet mit klaor.

P. De daverdagen bint veur een paar jaor ter ziele egaon
mar now is het Hunefestival geboren en hoopt op een langer bestaon.
Erwin Buld en Andre Wienen hebt direct hoge inezet
Want um een artiest as Guus Meeuwes te overtreffen dat valt niet zo veule met.
Mit dizze publiekstrekker kregen ze meer as 3000 meinsen in de tent
en ja dan bij al aordig verwent.

T. In het veur programma traden ook enkele Runerwoldse artiesten op
Zoals Bjorn Baai,Roy Moes,Wilson Lubbinge en zangeres Lisa Kreulen zij bint op weg naor de top
Lisa is de dochter van Petra beheerder van het dorpshuus hier op heden.
Zeg Pieternel weet ie wel wie het meest zenuwachtig was veur dit optreden?

P. Ik weet het niet mar Petra s harte hef der geleuf ik wel wat onder eleden.
Ook op de zaoterdagaovend mit as hoogtepunt het Duutse Feuerengel was weinig krietiek.
Dizze vuurwarkchow en keiharde muziek waren echt wat meer veur het jongere publiek.

T. 1 oktober was de dag van de parenverkoop an de Larijweg
Tjonge-jonge wat een paren dit jaor zeg.
Het duurde nogal even veurdat alles verkocht was
mar toen had de Karstenhoeve wel 700 euro in de tas
De boeldag s middags zorgde veur een zulfde resultaat
Mit die 1400 euro is de Karstenhoeve goed gebaat.
Het veurstel van B en W um de subsidiebijdragen te staken
Deut het bestuur in paniek raken.
Wij moet het museum sluten dan
was de reactie van veurzitter Jan.
Gelokkig hef de gemeenteraod dit weten te voorkomen,
mar 10% inleveren is deur de raod wel aangenomen.

P. De Karstenhoeve hef now ook een kuunst wark in de tuun staon
Wetholder Koster hef 1 oktober de onthulling edaon
Van het snujholt van de parebomen in het veurige jaor
meuken Jan Piet v.d. Berg en Hugo Galama een kuunstwark klaor.
Zij hebt dat holt in de vorm van een pare in mekaar ezet
En de Karstenhoeve pronkt hier now met.

T . Wat Bertus Luten beslist niet had verwacht
dat is dat de Koninginne an hum had edacht.
25 jaor bestuurslid van de voetbal is een hele tied
en ook in aandere maatschappelijke funktie s kan hij heel wat tied kwiet.
Tiedens de jaorvergadering van VVR worde hij flink in het zunnegien ezet.
Hum werd deur waarnemend burgemeester Vlietstra een Koninklijke onderscheiding opespelt.

P. 4 oktober was veur oenze regering een goeie dag
een ieder wet dat ie op Haakswold mar 60 kilometer in het ure rieden mag
592 bestuurders waren die dag de radarcontrole passeerd
en daorvan zaten der190 verkeerd.

T. De kiekie s dagen wurden weer goed bezocht
zij hedt die dagen ook de neudige boeken verkocht
Dizze dagen hebt zo langzamerhaand al een heel bestaon
Het bliekt dat er veural ook veul old Runerwolders op of koomt gaon
Die lui van deHistorie hebt het er die dagen mar druk met.
En zo kan het gebeuren dat ze ook wel ies gebruuk moet maken van het toilet
Zo vergung het Harm L.en Egbert W.
nao het gebruuk maken van de W C
dat ze gungen zoeken in alle hoeken
mar vunden gien papier of handdoeken.

P. Zij hebt bij het bestuur van de Karstenhoeve hun beklag edaon
mar toen bleek dat ze een flater hadden begaon
Want wat wij in het algemeen mar historisie toch wel in het bizunder niet hadden verwacht
dat ze hier een hypermoderne papierverstrekker hadden anebracht

T. VVR en Ajax die liekt wel wat op mekaar
zelfde teneu en straks ook trainers uut de eigen geledingen vandaar
Wilco Niemer en Paul Smid die gaot proberen
um Runerwold te brengen in hogere sferen
De vergelieking mit Ajax holt hier hope wij mit op
want bestuurlijk is het daor in Amsterdam een grote flop.

P. Bikkelen, mar veural smikkelen was een fietstocht die deur de Wolden ereden worden kun .
Mar der kwamen niet veul fietsers op of in het begun
Bij 11 bedrieven kun ie smikkelen
mar vanwege het slechte weer was het veur de rest echt bikkelen
Het is te hopen dat er dit jaor weer zo iets giet gebeuren
Want het was op zich zeer geslaagd zo hebt wij kunnen heuren.

T. Jan Ems is in de VUT egaon
Mar hoe komp het now mit zien worst bestaon?
Dat vraogt veule meinsen zich of
want die worst van hum die viendt ze echt tof
Veurig jaor hadden wij ook al wat mit Jan Ems zien worst te stellen
Hij zul stom wezen as hij die veur een zacht priezien verkopen zul wus er toen ene te vertellen.
Mar Jan hef zien worstrecept an zien opvolger overemaakt
en hef er vertrouwen in dat die dreuge worst nog net zo goed smaakt

P. Runerwolders bint Spekbraanders
Mar wij hebt hier now ook een club van spekverbraanders
Dizze toepasselijke name is bedacht deur een groep mannen die te veule kilo s hebt anebracht.
Een keer in de weke koomt ze bij mekare um op de weegschaule te gaon
En zij hebt al goed resultaat ehaalt in het 6 maonden olde bestaon
Mit zien negenen hebt ze al zowat 45 kilo spek verbraand
In heur eentien waren ze mit die poging al lange estraand.

T. Sociale controle kan arg goed wezen
dat hebt Reinder en Hennie Smit wel bewezen.
Zij zagen verdachte figuren
rond scharrelen bij de overburen
Toen 3 van die vrouwen naor binnen waren egaon
en der ene buten onder de bossies bleef staon
bint ze direct 112 gaon bellen
om de politie te bestellen

P. Nao een posien kwamen der meerdere politieaoto s mit loeiende sirene anesneld
De vrouwen hadden net het huus weer verlaoten zo is oens vertelt
Nog op de Haovelterweg kreeg de politie de vrouwen te pakken,
de buit hadden ze inmiddels al eloost uit hun zakken.
De sierraoden hadden ze gauw onder de bossies egooid.
Dat was de buit waorvan mevr. K.van deHaovelterweg was berooid.

T. Jan Mos en Gre waren het ofgelopen jaor 55 jaor getrouwd
dat opzich is het vermelden weerd.
Mar Jan had ook nog een paar jubileums mit zien peerd
Jan en zien peerd Hestra waren samen 100jaor
Zij koomt samen mit het mennen en vaardigheid in de klasse ZZ uut en doet het nog arg goed daor
100 winstpunten is een mijlpaal die ze ofgelopen jaor vol hebt emaakt wordt er beweerd
De uutgebreide huldiging deur de Woldruiters hebt Jan en Gre arg waardeerd.

P. Udi werd in november op heel veule toeschouwers trakteert
Onder de bezukers werd ook ds.Kloosterziel gesignaleerd.
Vrumde Vogels worde dizze aovend opevoert
En dit stuk leut ook de domeneer schienbaar niet onberoert

T. Hij hef er de aandere morgen in de karkdienst aandacht anbesteed
Dat is hier nog nooit eerder gebeurt bij mien weet.

P. De sunterklaos filmpie s van Runerwold Info bint goed bekeken
Niet allent deur de kiender is wel ebleken
Veul meinsen kunnen echt genieten
van de checkpieten en Lukie en Lexie de bandieten.

T. De vrijwilligeres van VVR wordt een keer in het jaor een aovend verwent.
Zii maakt dan ook de name van de vrijwilliger of ster van het jaor bekend
Dit jaor was die ere veur Hillie Spiekerman
Zij dut heel veule in de kantine en zo en daor weet ze bij de voetbal alles van.

P...Nao een paar jaor van ofwezigheid
was er dit jaor weer een aotocros wedstrijd.
Rooze had een terrein beschikbaar estelt
en mar liefst 142 deelnemers en 900 bezukers worden er etelt.
Bij zo n autocros giet het er vake nog al ruig an toe
mar gelokkig worden de hulpdiensten dizze middag niet moe .

T. De geruchten hadden al een posien de rondte edaon
Dat het mit de firma Vos niet meer zo goed zul gaon.
Mar het bericht dat ze failiet waren verklaord
dat was toch ongehoord.
Misschien dat het bedrief nog kan worden overgenomen
Daor is de curator now nog mit kandidaten over an het bomen.

P. Dat de kringloop winkel De Wolden goed blef lopen
is niet zo n wonder want zij hebt daor medewarkers die heel goed kunt verkopen
Leen Noordzei is vrijwilliger bij de kringloop ondertussen
Hij dut daor soms ook wat klussen
Op een keer zette hij de fietse op het terrein
dan hoefde hij niet zo wied te sjouwen mit zien gereedschap dat is wel zo fijn.

T. Mar toen hij op huus an wol gaon
zag hij nargens zien fietse staon.
Nao nog ies goed kieken
stund er wel zien fietstasse zo zul blieken.
Het bleek dat er een klaante ewest was die een fietse zocht
En fietsen hebt ze daor wel meer verkocht
De klaante had zien zinnen op dizze fietse ezet
de verkoper dacht nao beraod vut der met.

P. De fietstasse die muggen ze wel hollen vandaor dat die bleef staon.
En zo is die klaante der mit die fietse vandeur egaon.
Hij had gien naam en adres niet achter elaoten
Leen Noordzei raakte in alle staoten
ik was zo an die olde fietse ehecht
net een nije baand der umme want die olde was slecht

T. En now gebeurt dit
Daor bin ik mooi klaor mit
Natuurlijk is er een goeie oplossing ekomen,
Mar dit is een annekdote um van te dromen.

P. Volk wij wilt het hier bij laoten
ie hebt now ook weer wat stof um over nao te praoten
Meinsen gao vrolijk verder in het leven

T. As wij der vanaovend hier en daor een beetien naost de warkelijkheid zaten dan hope wij dat ie oens dat wilt vergeven.

naar boven